#مختارات_نسر_الصحراء
#جديد
{}{}{}{} بين الكاس و كاس {}{}{}{}
01 _ بين الكاس و كاس خنڨتني لنفاس
ويــا ساقــي سربــي عمرلـي كاسي
02 _ كاسي مـاهو تاي ولا راهو بسباس
انا شبهت الكاس و الساقي قرطاسي
03 _ يا غالط فالكاس كاسي ماهو كاس
انـا كاسـي معصور م الوقت الڨاسي
04 _ كاسي من سجرة عشقوها لجناس
و الهـــاوي فـــي بيــرهـا راه يقاسي
05 _ دارتلـو سلـوم فـي هواهـا دحاس
مشـروك مـع النفـس لأخرتـو ناسي
06 _ مــا عــارف تاليــه لا فمــو لا راس
بيـه النفـس مشــات للهـلاك يساسي
07 _ كـاس الدنيـا مر يـا ذايق من كاس
ســال مجـرب يــاك شيبتـلـي راسي
08 _ عيــت نسايـس مـا جبرتلها سياس
حتــى لبنـــــة مــــا توالمـــي ساسي
09 _ كـذا مـن غالـط فـي ظلمة دهماس
هامـس دامـس سايــرة بيــه مباصي
10 _ يڨـود فيــه بليـس و شباه الخناس
شــرو فــــات شـــرور شــر الخناسي
11 _ كي شمرت الخالفة عريت الڨنطاس
بين الساس و ساس ساكن هواسي
12 _ هــذا تاعــب ذاك يتـختـــل بهناس
و لآخـر مدمور في وسـط الحاسي
13 _ ويا مركب ڨادوم على قبضت الفاس
لا سربيلــي كـــاس طيــرت نعاسي
14 _ هنيلي ذ الراس ما طقت لوسواس
كــاس الدنيــا زيــدني منــه نطاسي
15 _ و يــا زارع الشوك في بر الترفاس
ســاط عليه الريح ماهو م غراسي
16 _ واش يجيــب فقيه لجاهل ينداس
واش يجيـــب بحــر للــواد الراصي
17 _ واش جـاب الزقــوم للبنـة هرماس
واش يجيــب الحـر لْساكن قفاصي
18 _ واش يجيب نباح لتكشارة جساس
نسر الصحرا ڨُالت ما جا في راسي
19 _ يــا ساقي سربي زيد عطيني كاس
ويكـــــون مرقــي يــداوي وسواسي
20 _ نسقـي بيــه الخاتمـة نبلــع الكراس
بيـن الكاس و كـاس تخنڨت نفاسي
21 _ يــا ربي يـا خالقـي يا مليك الناس
تغفرلــي مـــا فـــات بيــدك خلاصي
22 _ و نصلي ع الرسول نبني عليه الساس
صلــى الله عليـــه صلــي يــا ناسي
نسر الصحراء 2023/04/16
