أمر الله مكتوب و مسطر فاللوح
و الآجل محسوب ليلو و نهارو
من سبع سماوات يزرع فيك الروح
يعطيها ميعاد ترجع لجوارو
عن باهي لطيار نا قلبي مجروح
من جملة لحباب ذ الموت ختارو
ماني طايق في غيابو وين نروح
من بعدو لهموم زادوا و كثارو
كي نتفكر سيرتو نبكي و نوح
صهد الحب يسوقني بحذا دارو
عمري ماظنيت يهجرني ويروح
و يخلي عجاج ثاير بغبارو
صاريلي كيما الطير اللي مذبوح
يتخبط و الناس تنظر لعفارو
كية حبو دايرة فالقلب قروح
ومر فراقو زاد للقلب ضرارو
عاللكتاف محملينوا فوق اللوح
في قبرو حطوه ومشاو و سارو
خلاوك مردوم و ترابو مسفوح
والغدوة من ذاك للمرسم زارو
امر الله مكتوب ومسطر فاللوح
والموت المشؤوم غايب عقارو
يدي الشايب والصغير اللي فالدوح
ما يبقى فالواد من غير حجارو
السلطان
ليست هناك تعليقات:
إرسال تعليق