قصيدةالنجدة
جيتكم يا لحباب نطلب فالنجدة
غيثوني راه ذا جرحي نزاف
نستنجد بابيات في وسط قصيدة
مرقومة لوزان بحروفي زخراف
ولانجيكم ساري فوق ظهر عودة
رباعية شهبة تسبق لي رفراف
نشكي لك يا الله ذا غرام الخودة
كوايت قلبي سكناته في تجواف
الوقت المعلوم راني في كودة
يا زينة للماح ذا قليبي رفاف
مراحك يا ريم ظاهر في القعدة
حده جبل كسال اهلو ناس ظراف
صهدتني بحمى من بعد الرعدة
متزير في قليبي نتمنى تعطاف
متوحش حديث كي عسل الشهدة
قلبي منو يرقص و نتيا عزاف
يا بسمة قلبي راني في هودة
واد الحب صعيب بحملاتو جراف
حقك يا قلبي مانخليه في حجدة
هذا قول الصح مانيشي هفاف
شبهتي بن نعمان في صحرا جردة
منورة شاو ربيع من بعد التخراف
عينيك قراطيس مدولي مدة
صابو هاذ القلب منك في ترهاف
سالفك لون ذهب محلاه بجودة
محلاه صفاتو ونايا عراف
وينكم يا لحباب يا اهل الهدة
صيادين لعقاب وثاني طير الساف
ادعولي ربي يردني ليه ردة
هو الخالق في حالي شواف
اهدي هاذ النفس طوعها بالزهدة
بجاه الفرقان وسورة لحقاف
اجعلني يارب في صف الشهدا
وبالشهادة نفوز كي يومي تقصاف
نختم بالصلاة على نبي الهدى
صلى الله عليه سيد الاشراف
ليست هناك تعليقات:
إرسال تعليق