مترادف ذا الغيم عنّي ومطوّل
زايـد هاذ الـزمان همّـو عيّـاني
نحسب للخطوات نمشي نتمهّل
ونسايس فالسًعد راهو عاداني
ما اڨـساها لـيّـام عنّـي تـتبدّل
زادت في لٓعـْنـاد صدّت بلعاني
نتجرّع كيسان من مُـرّ الحنضل
وانـصبّر فالـروح عنهم عيـناني
نراودها بسياس ونـوزنـها بعقل
ونحـدٌثها بكلام الدّين الحقّاني
أجرك عند الله بالفُرجـة يكمـل
بالخير يكافيك و بأفراحو ثاني
وبـإذن الرحمان عمري لا نجهـل
نـدعي وبالصّلاة نقــاوم زماني
ونرجى من ربّي في حالي يعدل
تـتسڨّـم لـيّـام بجـاه الرّحمـاني
يتفاجى ذا الغيم عـنّي يتحـوّل
ويسعد هاذ الڨلب بافراحو هاني
وتحلا كل مُـرّة ك شهدات عسل
حتى الخير يهلّ قاصدني عـاني
وندعي للمـولى بالفـرج يعـجّـل
وبجـاه الرّســول طـه المـاداني
ياسمين
ليست هناك تعليقات:
إرسال تعليق