رباعيات فن الواو .
بشعر العامية المصرية .
( العيد .. فرحه و دروس )
كل عام وانتم بخير
يا حبايب كل عصر
الصيام دا كله خير
عالعروبه وأهل مصر
انتهى بينا المطاف
وانقضى الشهر العظيم
كل مخلص فينا شاف
قد إيه رمضان كريم
شهر مفتوح الجنان
للي أخلص في العباده
فيه الرحمه والغفران
والكرم موجود زياده
كل عيد وانتم بخير
والعزايم ليها طعم
أكل لحم وأكل طير
والصواني عليها كم
الفقير ما بننسهوش
يوم العيد م العزايم
والبخيل ما بنعرفوش
أصله وقت الشده نايم
خلي بالك من كلامي
زور قرايبك كل عيد
ابتسم وزع تهاني
للقريب ويا البعيد
العيدية مهما كانت
تسعد الطفل الصغير
والأيام دي مهما طالت
أسرع م البرق تطير
كلنا في العيد حبايب
مهما زاد بينا الخلاف
واللي يزعل أو يعايب
ينسى في العيد النكاف
يوم العيد فرحه وبس
ننطلق نلعب نسافر
خلي عندك رحمه حس
باليتيم وجبه وتذاكر
كل عام وانتم بخير
يا عرب أصحاب معالي
اعدلوا خلوا الضمير
فوق الراس دايما عالي
اللي يظلم ناسه غافل
مش مدرك إيه العواقب
واللي يبني ثقته عاقل
مش فاتح باب المصايب
---------------------
بقلم
السبت ٧ من مايو ( أيار ( سنة ٢٠٢٢ )
ليست هناك تعليقات:
إرسال تعليق