مجارات جديدة في قصيدة غزلية بعنوان الشبيهة للشعراء
الشيخ بوراس
علي بوعام
قادة سعدون
الشيخ بوراس.....
وحدة هاني شفتها كي .........
هاني شفت اليوم وحدة من ربعين
قلت لها عندي معاك ستفسيرة
قولي لي كي يجيك لجدل بوقرنين
خفي خفي واقلعي هاذ الحيرة
تقرب لك والا تقسمتوا نصفين
متشبيهن وعينكم قاع كبيرة
حتى فالوقفة حضيتوا مشبوهين
اللي نخزرها نقول هاذي وزيرة
واش اداني نشوف في باب العينين
تتمشى مشية نتاع تخنثيرة
تتساوج وتميل عن يسرى ويمين
هاف الخاطر شورها جات الغيرة
وتفكرت غزال ربيته بسنين
لوما درته صح للكسر جبيرة
وعاهدته عهد الوفا حالف ليمين
نفصلها وتعود من صمي جيرة
نرصنها وتعود مقصوف الجنحين
مانهدى لا وافية وال ڨصيرة
لا ڨرومة لا صحابات العشرين
روحي روحي واصلي فالمسيرة
عندي نونة ما نبدلها باخرين
هي عندي في قصوري اميرة
هي قايد حومتي وسط سلاطين
بوعام علي....
الممحون تبان له عڨبة تحديرة
ويتحدى صعاب مكتوف اليدين
يتسلل بالبين من خيط النيرة
ويبات عل الشوك حاسبها يسمين
هااا نونة خاب أزهر قتلتها غيرة
كي خلف مكانها لجدل بو ڨرنين.
.
الشيخ بوراس
ما تخلفش مكانها حت يشيرة
يا لوكان تكون من حورات العين
من نونة محال نرضى بعشيرة
يا لوكان نعيش نتغمس بالدين
بوعام علي
نونة وانصارها دارو مسيرة
حلفوا يامين وحدة م لثنين
يالوكان ندير عششة بحسيرة
ياك بنادم خالقه ربي من طين
تدمع بالعين واليد قصيرة
تشكي بضعفها لرب حنين
الشيخ بوراس
قالت ما نهدى خليلي في حيرة
تحلف ما تقبلش يدوهش لخرين
وياك نعيش معاه ناكل الفطيرة
نقرڨ معاه نقنس ذا الطاجين
تحت القطرة صابة نو غزيرة
نصبر يا لوكان في قربي بالطين
قادة سعدون
سيـدي ربـي شـوف هاذ السطيـرة
وغي من نونة جات صاحبه لعنين
ياعمي بوراس شـوف كانش ستـرة
وقادي نهبل من كلامك في ذا لحين
ليست هناك تعليقات:
إرسال تعليق