نتغزل ونحط شعري في كسكاس
نلقى شعري زادت عليه اللهسة
شعري تحلى بيه سهرات الجلاس
يغدا ويجيني ونبقى فالدرسة
هاذي مدة سال حبري فالكراس
واوصاف المخلول جايبهم خلسة
ظنيتك يا شعر لكحالي نبراس
ساعا زدت اجراح قلبي والنكسة
زدت دماس على دماسي عاددماس
طول الليل تقول حكمتني ضرسة
نقرا حرف بحرف غزلي بين الناس
يتخبل ويعود شعري يترسى
ظنيتك يا شعر لمحاني جساس
درت النية فيك وانتايا طفسة
تمحي من عيني النوم مع التنعاس
وتهوض عيطة قصايص فالنعسة
مايبريني شعر من زينة لخراس
لونكتب ديوان ملحوني ينسى
بحري فالملحون قي قطرة فالكاس
ليعة من ليعات قنسني قنسة
صوبني هاني نريب بلا قرطاس
قي نزوة وتزول مني في عطسة
نصبح شايش هايض عليا تقباس
ونعبلك لبيات نرجع في ونسة
ظنيتك تبري اضراري والتنكاس
درتك ليا ونيس تلقالي عفسة
نحسب روحي فالهوى كي بونواس
نونة كي جـنان في شطي ترسى
ليست هناك تعليقات:
إرسال تعليق