نڨول في وصافي نبدة
وتبان كي الطيف ڨبالي
ويليق لي ندڨ الفردة
عودة وصافها دنجالي
دهمة وصاف هذ العودة
نخطر غير كي تهوالي
دهاس واجدة لصدة
وموالفة نحط رحالي
من فمها الثلج تكدا
عضلم والبروڨ تشالي
مقيوم كلشي بالعدة
بها نفوت زوج ليالي
حتى نمل هذ الوحدة
الڨمرة مع النجوم تلالي
الصحرا برور فيها جبدة
القيفار والحماد الخالي
ماهي مطوحلة م الكبدة
وتنوشها رياح هبالي
فيها وصاف شبه الخودة
ولا وصاف زين غزالي
ولا وصاف زين الوردة
ونخاف غير لا تذبالي
نهدا وصاف هذ العودة
ياسمع الحديث صغالي
خوذ الكلام حل العُڨدة
ويليق ليك فك حبالي
عز الذهب فيه الجدة
ويشدلي دراهم مالي
نلقاه في نهار الشدة
يستر حالتي وحوالي
الحديد مندا يتصدا
ويعود مرشاوة بالي
لقديم في صناف الخردة
ولي جديد سومه غالي
لي بعيد باغي يبدة
مزال في حسابه تالي
ولي بغى العيب تعدا
نقول فيه نعت قوالي
نعطيه بلمعاني جلدة
نعطيه فن من قتالي
مابيه غير نكد الحسدة
باغي يشوف كي يصرالي
يشوف غي عيبوبه بعدة
اللحوم ذا الخلايق كالي
الغتاب قال هذي زردة
ربي يشوف يادلالي
أرتب في عقيلك وهدا
محال لا عرفت مثالي
حتى ولا طلبت النجدة
يديك جن طيف خيالي
يديك من حشود البلدة
يديك للثلث الخالي
وبلادها طلوع وهودة
العڨبة طلوعها جا عالي
ولي داه لعب الزهدة
مزال ماطلعش جبالي
والغيم على جبالي سدة
ورياح مهولالي حالي
لهوال مابقاتش تهدا
بحري مواج فيه فصالي
الشعر ياك زين الهدة
ونقول فيه كي تهوالي
مولوع به مثل العُمدة
معروف به باين لالي
انا نقول في ذا الردة
يا فاهم لكلام قرالي
اقراه ماتشوف المدة
مرسوم فيه وصف خيالي
بلخف ياك جات الصدة
تم الحديث في مقالي
صلو عليه نور الهدى
صلو على الحبيب الغالي
الشاعر بن الذيب حمزة
2022 /10/30
ليست هناك تعليقات:
إرسال تعليق