نتزوجها اليوم ونطلڨ غدوا
ذا مكتوب الله داير كيما هاك
قالت ليا الا الخبز مع القهوة
ونعيش مع العايلة انا واياك
فنانة في الطبخ وندير الحلوة
ونأڨر فالمصير نغلبلك بوراك
ماني كي لبنات نخرج فالعشوة
نحشم من ظلي ونحشم من باباك
سال عليا ناسنا اهل التقوى
كنا معروفين من شڨ الشباك
حبنانة اهل الكرم واهل النخوة
مافينا دوني ومافينا رنااااك
منك يابوراس خيرت القدوة
راهم قالو صيلكم ماهو شياك
كية قلبي شاعلة فيه النشوة
وافرح يا عقلي ليا ربي هناك
درت العرس وجاية ليا فدوى
مثل حمامة 🕊طايرة والا البراك
تتزعبل والروبة فوق الكسوة
تتجرجر هازة الحسكة والتشواك
هيتومة في جلدها كاين عدوة
مسلوخة ويبان عيسوبك وكواك
غاشيها باتو رقابة في كدوة
هاهي ناضت مندبة وكثر العراك
حتى بواها باينة فيه السهوة
غير يتبع فالنسا ويهز الصاك!؟
ماماها شكيت فيها ذي سلوى
ولوالة ومكثرة لينا الحراااك
ناضو ناسي ما قعدليهم صطوة
سبتها عادات ورثتها حنااك
اهل عداس مع النياطي في فدوى
عرق ادس اليوم ولى لي تصكاك
مرموصة وتخلطت جات القوة
رفدونا وحضا المطرڨ من والاك
صرعوني وتروست ذيك الربوة
بتي فالسيلون والبوليس حذاك
مطلوبة محكوم ليها بالرشوة
ست اشهر قدام لا تربح فالباك
نتزوجها اليوم ونطلق غدوى
نتهنى ونخيط رويسي بالاك
ذي بالية معولة منها ندوى
وشموتية صارية بيا فالشاك
خونتني ودات لي نص الثروة
كذابة ولقات طماع و سلاك
للترفيه والفكاهة... قصيدة فدوى...
ليست هناك تعليقات:
إرسال تعليق