قصة سيدنا يوسف عليه السلام
من بداياتي في الشعر
قصة سيدنا يوسف
بسم المولى خالقي عالم لسرار
متفرد معبود لا غيرو ثاني
نصرد ذ القصة عليكم يا حضار
فيها من لمثال حكمة و معاني
فيها عبرة واضحة للي مغيار
و من يحسد ويغير يشقى و يعاني
قصة يوسف شايعة في كل قطار
بدر من البودور صاطع نوراني
شاف الشمس مع لقمر ضاوي دوار
وعد الخوت نجوم فالكون الفاني
سجدوا ليه و ناض من نومو محتار
شور بويو قالوا واش بلاني
يابابا راني فطنت مع لفجار
شفت منام اليوم ياسر عياني
يا بابا شفت القمر و الشمس نهار
و شفت كواكب عدها عد خواني
ف الحين اكتملو الهدرة يا حضار
نصحو ما يحكيش سرو بالعاني
راني خايف خاوتك ياذوك جهار
لو تحكي هذ المنام الرباني
و الخاوة هيهات غيرتهم تكثار
من يوسف لقلوب تغلي دخلاني
نتلموا و نعاقبوه على اللي صار
نتحاماو عليه في مضرب داني
نرجموه نطيشو فوقوا لحجار
يرجع حب البوينا لينا ثاني
واحد فيهم قال يا خوتي ذالعار
ما نسمحش يموت قدام عياني
خليوه فالبير لا من جاب خبار
ياك الما يحي جميع الحيواني
و مشاو ليعقوب خلقولوا لعذار
قالوا يوسف راه ديما وحداني
ابعثو يرعى و يلعب فالنوار
حية ما تاذيه من إنس وجاني
قاللهم في غيبتو قلبي ينهار
خايف من ذيب الخلا يتبلاني
قالولوا ذيب الخلا ديما مكار
ويذا قرب راه عن نفسو جاني
وداوه للبير في أرض القيفار
خلاوه مردوم ف الجب يعاني
والعشوة فالليل كي رجعوا للدار
يبكوا و الدمعة تهذرب ويداني
قالوا يا بابا درقنا ف المشوار
و المرحوم بقى يراعي وحداني
جاه الذيب كلاه قلنالك ما صار
شوف لدمو راه ظاهر عيناني
قاللهم عن ذ البلا راني صبار
و نوكل ربي على واش بلاني
و بقى يوسف ف البلا ليلة ونهار
حتى جا يسقي وصيف العرباني
دلى دلوو قال يا جمع الحضار
راني شفت صغير فالبير يعاني
جبدوه و ساقوه من جملة لوزار
و تباع الغالي بسومة لحفاني
و شراه الوزير للخدمة فالدار
ولى عبد خديم بين الوصفاني
و كبر يوسف زاد فالبها مقدار
بدر من البدور وجهو نوراني
و تفتنت مرت الوزير عقلها طار
و دعاتو ف الحين للفعل الداني
قاللها معاذ ربي عيب و عار
ما ننجمش نخون منهو رباني
خافي ربي يامرا و تلفت دار
هو يجري و المرا تجري ثاني
حكمت ف القميص من جيهة لدبار
و اتسنسر ف الحين خيط الكتاني
حل الباب لقى فوجهو مول الدار
نطقت زوليخا الخداع سباني
لازم تحبسوه في حبس الفجار
و يتعذب عن فعلتو هذ الجاني
و نطق يوسف قال هذ الشي ماصار
شوف لخيط الصوف تفهم لمعاني
أفهمها لعزيز من شوفت لبصار
و كتمها في خاطرو ما هو هاني
وتعدوا ليام في حزن و دمار
و مشات الهدرات بين النسواني
سمعت زوليخا و عرضتهم للدار
لمطارح و مخاد من كل الواني
و اعطات سكاكين لجميع الحضار
و خرج يوسف في بهاه الرباني
كي شافوه لهاو فالزين المسرار
و اليدين غداو كي لحم الضاني
قالوا ملك من السما جانا طيار
ماهو ولد عباد ماهو الشيطاني
قالت لمتوني عليه و قلتوا عار
و اليوم دعيتوه ليكم عيناني
لازم يقبل بالزنا و يعيش خيار
و لا في لحباس يرشى ويعاني
قال السجن مليح من لسعات النار
نتهنى من كيدهم نرجع هاني
و صبح مسجون في ليلة و نهار
و معاه الفتيان سجنوهم ثاني
واحد شاف منام للخمرة عصار
ولآخر قال الطير ف الراس كلاني
شفنا فيك الخير يا صادق لخبار
و طلبناك اليوم تشرح لمعاني
قاللهم من شاف روحو ف التعصار
يمنع و يولي لخدمتو هاني
و لاخر في لوحات مدقوق بمصمار
و الهامة ف الراس تنهش دخلاني
وصدق يوسف في كلامو للعصار
و غدا ساقي في قصور السلطاني
و تعدوا لعوام يجرو يا حضار
و شكى يوسف للكريم الفوقاني
شاف المالك في منامو سبع بقار
مرهامين كلاو من سبع سماني
و سبولات معمرة ب القمح خيار
سبعة و سبولات ف القحط تعاني
و تحير في شوفتو ما صاب خبار
طول الليل يبات يحسب وحداني
و تفكر ف الحين هذاك العصار
قصة يوسف و المنام الرباني
قال انا نفتيك و ارسلني بشار
نصفى للمظلوم نحكيلو شاني
و غدا ليه و قال يا شارق لنوار
بشرني ب الخير يهنى سلطاني
قال السبع عوام يتعداو خضار
و الغلة ب الكيل محسوبة ثاني
دسوا منها ف المطامر ب القنطار
و الباقي خلوه عولة لمحاني
و تجي سبعة كل شي فيها يصفار
تلقاو المطمور واجد و مداني
و العام اللي بعدها خيرات كبار
تزهى لارض مع السما و الحيواني
السلطان دعاه و رسلو بشار
قال أرجع سقسيه عن ذالنسواني
تهموني ب الزور و اتظلمت جهار
ف الباطل مسجون من ذ البهتاني
قال المالك للنسا واش اللي صار
نطقت زوليخا الشيطان غواني
و النفس تشهات في سابغ لشفار
و اليوم نبريه من ظلم عواني
قال اليوم تكون من جملة لخيار
و تعاشر لملوك بعد التمحاني
انديرك وزير عندي مستشار
و جميع اللي فات ننساوه ثاني
فيدك حكم اللي خزناه و لسعار
واعدل بين اللي فقر و اللي غاني
و جاو الخاوة طالبين القوت جهار
قصدوا للعزيز مرفوع الشاني
دخلوا ليه شفا عليهم يا حضار
و استخبر عن خوه من ضرب معاني
قاللهم جيبوه نوفيكم لعبار
و نضاعف لكيال و نزيد اوزاني
و يذا ما جبتوه ما تدوش غمار
و تموتوا ب الجوع مثل الحيواني
و مشاو ليعقوب يحكولوا ما صار
قال اللي درتوه في خوه كواني
عاهد ربي ما تجيبوليش اعذار
و نحاسبكم بيه عند الفوقاني
و ساروا بيه خويهم ليلة و نهار
يبغواا بيه الكيل عند السلطاني
شافو يوسف قال سعدي بالزيار
و ستفرد و داه شور البنياني
قال اليوم نبشرك تبقى محتار
انا يوسف خوك يا ضو عياني
غدروني لخوان في أرض القيفار
و المولى من فوق باللطف حماني
و الحمد لله بعد غياب دهار
نتلاقاو اليوم في ذ الماكاني
و تعباو رحالهم ب الوزن عبار
من قمح المطمور و جفان دهاني
و الرحل اللي سايقو خوه المسرار
خلاو السقاي فيها ب العاني
كي ساروا لرحال لحقوهم مشوار
قالوا سراقين صاع السلطاني
قالوا ما جيناش عندك للتشفار
جينا جيعانين للرزق نداني
و اللي يسرق ينكشف وسط الحضار
و يولي مملوك بين الوصفاني
و تحطوا لرحال و نكشفت لسرار
و ضحى بنيامين متهوم و جاني
قالوا بكري خوه يسرق للتجار
هز عليه خدايمو ذ الشيطاني
خباهها مسكين في قلبو مضرار
من تهمت لخوان زور و بهتاني
قالولوا باباه شايب من لكبار
عاهدناه عليه يرجعلو هاني
نترجاوك سيدنا ب العفو جهار
ولا تاخذ خوه في عوض الجاني
قاللهم موحال نسمح للغدار
ما نقبلش العوض ف العبد الداني
كي قطعوا لياس قعدوا فوق حجار
قال كبير القوم عهد الشيباني
ارجعوا لبوينا و حكوا ما صار
ما نقدرش نقابلو صوب عياني
بنيامين معاه ما نخطيش نهار
حتى يسمحلي الرب الفوقاني
كي رجعوا لبويهم صردو لخبار
قال النفس الخاينة و الشيطاني
و تفكر مسكين يوسف زاد نهار
هم الخاوة يا لخاوة بكاني
قاللهم في سيرتو نغدا مضرار
و العينين طفاو من دمع جفاني
روحوا شوفوا فالمضارب و القيفار
بنيامين و خوه حبو رشاني
و مشاو الخاوة يهوموا فالقيفار
و يسقسيو عليه بين رعياني
يتمناو يروحوا جملة للدار
و يصفوا لقلوب من كيد زماني
دخلوا للعزيز يترجاو اخبار
عن خوهم و يكيلوا قطع اوزاني
قالوا يا لعزيز مستنا لضرار
ارحمنا جيناك مالجوع نعاني
قال نسيتوا واش درتو يا فجار
في يوسف لعزيز خير الشباني
بعدن طيشتوه في أرض القيفار
من عليه الله خالق لكواني
نطقوا ليه جميع يا باهي لنظار
انت يوسف ؟ قال و انتوم خواني
نعطيكم هذ القميص ادوه شوار
وجه الشيخ يعود للشوفة ثاني
كي ساروا برحالهم شور الدوار
أتكلم يعقوب ذ الريح نشاني
ريحة يوسف جاتني راني مضرار
قالوا خرف ذ العجوز الشيباني
كي جاه القميص و لى للتحزار
قال المولى راه بالعلم كفاني
نطلب ربي خالقي عالم لسرار
يعفو عنكم من فعال الشيطاني
و يطهر لقلوب تصفى من لعثار
ما يبقى فيها كحولة من راني
نتلموا ف الحين و نروحوا زيار
للعزيز و خوه وحشو ناداني
دخلوا ليه تعانقوا و الدمع مطار
و بياضت لقلوب بين الإخواني
و رفع والديه فوق العرش جهار
بالسجدة حيوه كي وقت زماني
يا بابا لمنام تاويلو ما صار
وعد من الاله مول البرهاني
و حسن عوني كي طلقني من ذ الغار
و جمعنا من بعد نزغ الشيطاني
و الحمد لله في ملكو يختار
علمني تأويل لحديث معاني
فاطر لرض مع السما ظلمة ونهار
ف الشدة ب حمايتو يتولاني
اختملي ب الخير يا فالق لثمار
نلحق بالصلاح و أهل الإيماني
السلطان المغترب
ليست هناك تعليقات:
إرسال تعليق