الشمعة....بقلم جمال جلالي

 #مختارات_نسر_الصحراء

من الارشيف 2020 قصيدة {{ الشمعة }} 

♕♕♕♕♕♕♕♕♕♕♕♕♕♕♕

– حَشَمْتَـكْ بَـالله يَا شَمْعَــــةْ وَاشْ بِيكْ 

   ♕♕ تْبَاتِـي طُولْ الّلَيْـلْ دَمْعَكْ جَرَايَا 

– بَكْيَـكْ بَكْـيِ حْزِيـنْ لَا حَــــدْ يْوَاسِيكْ 

   ♕♕ حَيَرْتِـي عُشَـاقْ بهْـدَابَكْ ضَوَايَا 

– اّلسَــــرْ لِـــي فِيـكْ يَــا شَمْعَةْ يَهْدِيكْ 

   ♕♕ شُعَـــارَهْ وَشْيُـوخْ فسَـرَكْ غَنَايَا 

– حَشَمْتَـــكْ بَالله يَــا شَمْعَــــةْ مَا بِيكْ 

    ♕♕ تَضْـوِي ع اّلـﭬْلُوبْ وَانْتِ بَكَايَا 

– تَبْكِي مَنْ لَفْرَاقْ مَحْبُـــــوبْ مْخَلِيكْ 

   ♕♕ وَلَا بَكْـيْ خْلِيلْ مَا عَـــادْ هْنَايَا 

– وَلاَّ حَـرْ اّلنَــارْ اّلصَهّدْ لِـــــي كَاوِيكْ 

   ♕♕ جَاوْبِينِـي بَالله لَا تْزِيـدْ شْقَايَا 

– سَاهَـرْ طُـولْ الّلَيْـلْ وَانَـا هَايَمْ فِيكِ 

  ♕♕ تَايَهْ بَيْنَ حْرُوفْ هَايَمْ ف هْوَايَا 

         

                  قالت لي 

– ﭬَـالَـتْ لِـي يَـا شِيخْ سَمَعْنِي مَا بِيكْ

   ♕♕ دَنْدَنْ دَانِــي دَانْ ﭬَـابَلّتْ مْرَايَا

– لَوْمَا دَمْعِـي سَالْ مَا نَضْوِيشْ عْلِيكْ 

   ♕♕ سَـرْ بْكَايَا بَــانْ فَصَــلْ لَحْكَايَا

– اَوْزَنْهَـا بَــــــوْزَانْ اّلمَلْحُــونْ يْوَاتِيكْ 

   ♕♕ سَمَعْنِـي يَا شِيخْ اَكْتَبْ لُوصَايَا 

– لَيْلِـي رَاهْ طْـوَالْ رَانِـي نَرْجَـى فِيكْ 

   ♕♕ مَا تْخَبِيشْ اّلسَـرْ تَعْرَفْ مَا بِيَا

                    ڨُلتلها 

– يَا شَمْعَـةْ يَهْدِيكْ مَانِي نْشِيـخْ عْلِيكْ 

   ♕♕ ﭬََـندُوزْ وعَطْشَانْ لَبْحُورْ اّلغَنَايَا 

– لَـوْ نَجَمّتْ نْبُوحْ يَــا شَمْعَةْ نْحَاكِيكْ 

   ♕♕ نَحْكِي لَكْ سْرَارْ مَاصَبْتْ دْوَايَا

– مَـا يَبْقَاشِي سَـرْ مَــــــا نَحْكِيهُو لِيكْ 

   ♕♕ لَطْمَتْنِـي لَمْوَاجْ خَبَيْــتْ شْكَايَا 

– اَدْفَنْتُو فِي بِيـرْ لَا مَــــنْ طَـلْ عْلِيكْ 

   ♕♕ مَتْوَكَـــــلْ عَّ الله رَبِــي مُولَايَا

– وَانْـتِ يَـا شَمْعَةْ مَــــا عَنْدَكْ مَا بِيكْ 

   ♕♕ مَـا هَجْرَكْ خْلِيلْ لّفْرَاقُـو بَكَايَا

– مَا شْرَبْتِــــي مَـنْ كَاسْ لَغْرَامُ يَدِيكْ 

   ♕♕ مَا طْعَنْتِيشْ بْحُورْ اّلدَنْيَا عَيَايَا

– اَبْقِي يَا شَمْعَــــةْ مَانِيـــشْ مْخَلِيكْ 

   ♕♕ اَبْقِي يَا شَمْعَةْ عْلِينَـــــا ضَوَايَا

– لَوْمَـا دَمْعَــكْ مَـا نْخَرْبَشْ وَنْوَاسِيكْ 

   ♕♕ لَوْلَا دَمْعَـكْ مَـا تْخَطَتْ لَقْصَايَا

– اَضْوِي يَا شَمْعَـــــةْ شُعَــارَهَ تَشْتِيكْ 

   ♕♕ اَضْوِي يَاشَمْعَةْ بَدْمُوعَكْ جَرَايَا

– اَضْوِي يَا شَمْعَةْ وَمَـنْ بَكْيِــيِ خَلِيكْ 

  ♕♕ اَضْوِي يَاشَمْعَةْ وَنَعْطِيكْ سْمَايَا

– جَلَالِـــــي جَمَـــالْ لّلسَامَــــــعْ وْلِيكْ 

   ♕♕ فِـي شَهْـرْ اّلثُـوَارْ تَمَـتْ لَحْكَايَا

– أَلْفَيْـــــنْ وْعَّشْرِيـنْ رَاهْ مْتَوْرَخْ بِيكْ 

   ♕♕ خَطَيْتُو بَحْرُوفْ وَانْتِ ضَوَايَا

           خَطَيْتُو بَحْرُوفْ وَانْتِ ضَوَايَا

♕♕♕♕♕♕♕♕♕♕♕♕♕♕♕

                     نسر الصحراء  2020/11/15