شفت منام الا البارح فالغاسول
نوضني مانيش في نومي راقد
جاني بويا قال لي يا ولدي ڨول
راه الوقت يدور وانت تتساند
يا ك النافر مايرومها بزوول
بيع من الهديور ماكان قفايد
والتومي محال ترويه المبطول
هو ماهو ولدها ماهي والد.
وام جنافة ما تغلث ع المرحول
عرضة للصياد يلقاها واجد
تربيها تصفى الصافي والمختول
والمجنونة ادور ثاني وتعاود؟
المروية و المدخنس والمشلول
داويها بالاك تبرا تتجاهد!!
ياولدي كسب الغنم من بعدالحول
وياك العام يبان فالخرفي طاند
واذا تشتي الرامبي بدل الفحول
والكرنان الشين خليه يباعد
كرنبو تلقاه فالصرحة مذلول
ماهو شيعة للغنم ماهو قايد
بيعه للجزار يرحيه مع الفول
حتى في لعياد مرفوض وڨاند
ذا هو حال البنادم شبه سبول
يهفى ويذريه حصاد وجاحد
متن سرجك بابني كونك راجول
ميز عود مليح للخطرة زايد
متصيل يبكي على السيرة مهبول
تطوي بيه برور عڨبة وسنايد
خير صاحب كي الناصر قي مجهول
متخبي ويبان في وقت شدايد
وصحابك لخربن تعرفهم بالطول
ذي مدة وسنين بيهم تتشاهد؟
ياولدي حط اللجام على السلسول
متن رجلك دير للدير حدايد
وعوينك خليه مرفود ومخمول.
لاتنساش تحط حذرك وتصايد
مرة مرة سرح الڨصبة والڨول
والملحون تجيب منه القصايد؟!
ليست هناك تعليقات:
إرسال تعليق