( الفهلوي باشا )
بقلم د / عبد الرحمن فتحي الحناوي
الفهلوي بقى باشا والباشا راح في الرجلين
والواطي كأنه فراشه بقى عالي في غمضة عين
والعالي أبو البشاشه بقى واطي لوقت وحين
والوضع بقى كله هشاشه. والدنيا رايحه علي فين
الواطي بياكل بغاشه والعالي أكْلِتُه رغيفين
وعقولنا تاهت عالشاشه والكُحْل سرقوه م العين
والنصب عالناس صار عاده والحق بقى عار ومُشين
والعلم بات في الادراج والطلبه من غيره تايهين
والغش بقى عالأبواب والجوْده هربت عالصين
والصحه سايبه المحتاج بيواجه مرض واتنين
لا رعايه ولا صرف علاج ولا خدمه للعيانين
والسكه مطباتها كتير والحُفر ماليه الجنبين
محتاجه مسؤول بيخلّص ويمهد طريق واتنين
وحوادث بتطل علينا من قتلي ومن مصابين
****. ****. ****. ****
الفهلوي موجود حوالينا وبيكتب بس بِوِشّين
ولا مره كتب الحقيقه ولا يعرف مكانها فين
القيم انهارت وبلاش حد يقول احنا موافقين
موافق على إيه ما خلاص دا المر شاربينه سنين
يا جامع أسرارنا سؤال : سعادتنا سرها راح فين
أنا شايل كل الأخبار واخباري أكترها حزين
والناس من كل الأعمار منتظره فرجك يا معين
يارب حقق الاحلام واكتبنا عندك فايزين
َوابعدنا عن أي شِيطان واحفظنا من شر العين
--------------------
الخميس ٦ من يوليو ( تموز ) سنة ٢٠٢٣
+
ليست هناك تعليقات:
إرسال تعليق