بشعر العامية المصربة
( حلو الكلام يكفينا )
الناس بيقولولي إنتا ليه مش حاسس بينا
ما بتكتبش عن الظروف والغلا اللي بينهش فينا
ونسيت القضيه وغبت وما عُدتش تفكر فينا
قلت لهم إزاي دا يحصل وانا شايف بلادي مدينه
بديون تهد جبال وفوايدها عبء علينا
أزعجكم بكلام عالفاضي ولا اكتب حلول تِنْجِينا
طول عمري بكتب وحاسس بنبض الناس حوالينا
بكْتب كلام ونصايح وما حدش بيسأل فينا
قالوا لي اكتب ووضّح حلو الكلام يكفينا
وينَسّينا الغلا والضنك ويثّبت العقل فينا
قالوا لي اكتب وغرد واعرض همنا وشكاوينا
الدنيا لسه بخير وكلامك دا نور لينا
قلت لهم سيبوني أدور علي وادي مريح لينا
يكون الرزق فيه وافر وظروف العيشه ترضينا
فيه الحياه لها طعم والبشرى تعم نواحينا
وحشتينا قوي يا سعاده انتي فين وحشتينا
الكلمه الحلوه من قلبك بسرعه بتأثر فينا
والفكره الصايبه تندهلك تريح بالنا تِشجينا
والعيشه الحلوه لو جنبك أبدا مش خساره فينا
------------------
بقلم د / عبد الرحمن فتحي الحناوي.
من مصر.
الثلاثاء ١٨ من يوليو ( تموز ) سنة ٢٠٢٣
ليست هناك تعليقات:
إرسال تعليق