خطرات نقول باه ننسى
يخطيني حبها الخودة
تهدفلي كي ليل لمسى
بارد ومعاه ريح سودة
نغفى تغلبني النعسة
ونريب مع كل هودة
عيني ماهي عين قوسة
عيني تصحي كل كودة
مثلتك زهرة وملسة
فتحت وتزيد فالشدودة
نخلة وحضاوها العسة
ويزيد جريدها صعودة
مثلتك ڨمرة وترسى
تضوي وتهرب القرودة
مثلتك كالريم جسة
تدوى من حس البرودة
والا نحلة وفيك لهسة
عسلك غارس فالشهودة
تعجبني فيها اللبسة
تتباهى في كل مودة
تخرجلي من كل عفسة
بلعاني خيري الجودة
ولقيتك قي بنت تڨسى
قلبك صمي كالقفودة
ماحنت ع اليتيم ترسى
ما حلبت مابغات ڨودة
شرادة ماهيش هسة
نركب للقاها العودة!؟
ذالنونة فالفم ضرسة
خلقت لي فالراس دودة
وانايا موحال ننسى
ذا النونة فات الحدودة
ليست هناك تعليقات:
إرسال تعليق