يا شعراء. راه قلبي فرفر طار
قاصد للمحبوب طول بغيابو
وانا شعري مايجي كيما لشعار
شعري فيه الغاز ومترع بابو
هذا النوبة سبتي كحلة لشفار
نحصيهم في زوج كانو يرتابو
نوصفها ونقول لهدبها الكبار
قرطاس البارود يقدي تصوابو
حاجبها كيما السيف لي بتار
مسنون ويهدى اللي قربه غابو
خدودك تفاح نابت في لشجار
من باي اسطنبول مهدي لحبابو
والشفة حب الملوك بلا تعبار
سناتك حبات جوهر. يتحابو
شعرك آحصراه كانو فيه اذفار
فوق الفلكة تلاوحو منها رابو
خيط نتاع حرير جابوه التجار
من شق العراق وانا كسابو
مثل العظلم غاصبة قطعت لبحار
سكنت في لوروب وعليها نابو
ضحكتها فيها من المسك العطار
غالي في لسوام فايح بشبابو
تتمشى كيما القايد في التدوار
يتفاقد جنود في الساحة هابو
قيتارة ومشعلة قلبي تزهار
والا عُود حنين وانا زريابو
سلطانة في قصرها نبتو لزهار
حديقة فيها زبردج وترابو
كي تنطق يتصنتو ليها لبصار
نخزرها وجوارحي منها تابو
نبقى بين الشوق والولف ولوكار
ماضيا هاهو تجدد بعذابو
شهلى. هيفا. دمرت عقلي تدمار
عطبولة وافي عظمها بحسابو
سيدي ربي يا الوحيد القهار
سلك عبدك راه مكوي بجنابو
قلبي شاش وشوقت ليا لفكار
وبقى في الكبدة يرشخ نشابو
نصبر صبر ايوب وانايا صبار
بعد الصبر يعود صبري لصحابو
ليست هناك تعليقات:
إرسال تعليق