شيبنا ذا شبوب لي شفناه
ڨليبي خلاه مصهود ابنارو
زينو كامل ألف واحد يتمناه
ذي مدة عنا توارات اخبارو
واش يدر العبد في حكمة مولاه
يرضى بلكتوب يصبر لقدارو
الڨلب المهموم وين يصيب أدواه
للمحبوب بقيت مشية لشوارو
ماناسي ماضيه و العقل لي تاه
في بحر العشاق تايه بشعارو
فسرلي لمنام يا فهم معناه
حارم نوم اليل وسواد انهارو
نتأمل في نجوم نرجا في ملڤاه
عول للهجران يخلف في ثارو
لاه هجرنا لاه بعدن والفناه
سره خافي هد ڤلبي وصوارو
نبات نهترف قي نهاتي له بسماه
وحبابي كاملين في أمري حارو
راني حال الغريب بعده ما طڤناه
و مصعبهم أيام عني كي جارو
صابر يالحباب الأمر الله وقضاه
يجمعنا ذالوقت وتزول اعذارو
شاتي ذالمرة خاطري يصفاه
بعد غياب سنين يرجع لوكارو
ليست هناك تعليقات:
إرسال تعليق