واش اداني نرميه للبلا واش
هاذاك لي ذالو سنين متحاشي
كنت مخليه كذاك في الجوى خاش
و يكدد فيه الشوق بالهوى راشي
عييت نقسي فيه لان و هشاش
و نصيبه في غفلة لهاوية ماشي
و سبابي فالبلوى امّات لرماش
خطافين الغمزة رصاصهم فاشي
ذلوه النوم من الزعاف ما جاش
ما خلاوه يهنى منام بفراشي
شافوه الورد على جناينو طاش
يتباهى في للوان زايد هراشي
هذاك بيض هاذاك بيض لحناش
هذاك ترابي ذاك ورث ناجاشي
و انا مالي ندي اللا الطشطاش
و اللب اداوه ناس مالهم قاشي
ضنيت انا راني حضيت دهاش
و انزنڨ في صابة زراق و حواشي
و ذالخير اللي عاطيه بر نشناش
صحوني منه ڨيزتين و بلاشي
و انا بلي فيا ضعاف و عطاش
و الحمل امبرع في برور متعاشي
مدي في زبدو زاهي الخملاش
و الصمي كيما نا ثڨال و مطاشي
وقتاش ايحسو بالثقيل وقتاش
خايف لا ينسوني ليا الـ تنعاشي
ما حنو ما منو بغاو لعشاش
في العش لي نبنيه تاه ڨشڨاشي
خلوني خلوني الڨلب نڨراش
واش يهلك بركان حض متغاشي
ينعل بوه الملحون ما وزنهاش
كلمة فالذات ربات ما وفاهاشي
(خضر الحيدر) في الشعبي الجزائري
ليست هناك تعليقات:
إرسال تعليق