#جديد
** اّلشَهَـــــــــــــارْ **
01 – نَبْــــــــــــدَى بَسْـــــــمِ نَحْمَــدْ وْنُشْكُرْ
** وَصَــلَاةْ عْلَــــى اّلنْبِــي زَيْـــنْ اّلَنسْبَة
02 – سَمْعُو لَيَــا يَـــا لَحْبَـابْ مَا رَايَحْ نُذْكُرْ
** فِـــي حَــــالْ اّلشَهَـــارْ خَطَيْـتْ كْتَيْبَة
03 – كِـــي يَلْحَـڨْ اّلشْهَـــرْ يَبْــدَى يَتْحَرْحَرْ
** تَبْدَالُــــو لَوْجَــــاعْ مَــنْ تَحْـتْ اّلرُكْبَة
04 – يْطَلَــــعْ وَيْهَــــــوَدْ دَاهَـــــــشْ مَتْوَتَرْ
** مِيـّـــنْ يَبْــدَاهْ مْنِيــنْ يْسَلَـكْ ذَ اّلغَلْبَة
05 – يَدْعِـــي فِــي رَبِــي غِـــي بَــــاهْ يْوَفَرْ
** لْوَقْــتْ اّلحَـــــزَاتْ يْبَلَـــــــــعْ ذَّ اّلثُقْبَة
06 – هَـا شُوفْ اّلحَصْلَة وْهَا شُــوفْ اّلمُنْكُرْ
** مَــــا يْبَلَعْلُـــــو بَـــابْ مَــا يَبْنِي عَتْبَة
07 – مَــــا يْسَلَكْلُـو دَيْــــنْ مَنُـــــــو مَتْحَيَرْ
** عَنْـدْ صْحَـابْ اّلخَيْـــرْ كِـي دَارُو سَبَة
08 – مَـــا يْعَمَــرْ ﭬُفَـــة وْلَا ﭬَبْضَــــة قُصْبُرْ
** وْلَا يْفَــــــرَحْ وْلِيــــدْ شَاهِـي ذَ اّللُعْبَة
09 – تَالِيتَــــهْ حَرْفِــــي اّلقَهْــــــوَة وَاّلسُكُرْ
** وْمَــا يَكْرَمْلُـو ضَيْفَ مَا يْدِيرْ اّلوَجْبَة
10 – يَوْصَـــلْ لَلْحَانُــــوتْ يَرْجَـــــعْ يْصَفَرْ
** كِي اّلبَارَحْ كِي اّليُومْ يَاخِي مُوصِيبَة
11 – هَــا شُوفْ اّلحَصْلَة وْهَا شُوفْ اّلمُنْكُرْ
** ﭬَــــاعْ اّلعَـــامْ يْــــدُورْ وْهُوَ فِي زَرْبَة
12 – يَفْتَــــحْ هَـــذْ اّلبَــابْ يَتْسَكَـــــرْ لاَخُرْ
** تُخْـرَجْ لَـــــهْ مَنْهِيــــهْ كَـــذَا مَنْ سَبَة
13 – ذَا كَاعَـــطْ اّلضَـــوُ اّلبَزْرَة زِيــــــدْ بْزَرْ
** وَيَــا وَيْحُو مَــنْ كَــانْ يَقْصَــدْ اّلطُبَة
14 – أَﭬْلَبْهَـــــا عَشَـــابْ نُوخَـــــــة وَاّلزَعْتَرْ
** وَلَا شِيـــــخْ صْحِيــحْ اَوْعَـــدْ اّلطُلْبَة
15 – اّلقَهْــــوَة بَاّلشِيـــــــحْ لَــــــرَاسْ تْزَيَرْ
** لَاتَــــــايْ بَاّلنَعْنَـــــاعْ لَنَشْـــــوَة هِيبَة
16 – عُـودْ قْرُنْفُـــلْ بِيـــهْ عَطَـــــرْ وَتْبَخَــرْ
** زِيــــدْ فْلَيُــو كَــــانْ تَعْــــَرفْ لَلْعَشْبَة
17 – عَذْرُونِـــي يَـا لَحْبَابْ غِي جَاتْ تْكَوَرْ
** ذَا وَلَيْـــــــتْ نْعَـــدْ مَــا تَكْفِــي كَتْبَة
18 – ذَا حَــــالْ اّلشَهَـــــارْ مَـا هُوشْ مْزَيَرْ
** مَــنْ قَلَــــتْ اّلشِـــي وْيَكْــرَمْ بَمْحَبَة
19 – مَــا تْخَافُوشْ عْلِيـهْ اّلمَكْسُورَة تَجْبَرْ
** يْسَلَكْهَـــا بَيْطُــولْ ذَا وْلِيــــدْ اّلنَسْبَة
20 – بْرَاسُــــو مَرْفُـــــوعْ عَرْبِــــي مَتْجَدَرْ
** قَانَـــــــعْ بَاّلمَكْتُـــوبْ مْسَلَــــمْ لَطُلْبَة
21 – وْخَدْمَـــــةْ لَحْــــــلَالْ بِيــــــهَ يَفْتَخَرْ
** وْمَحْلاَهَـــــا نَعْمَــــة اّلخُبْــزَة اّلطَيِّبَة
22 – كِـــي يَحْمَــــدْ رَبِـــي يُشْكُــــرْ وَيْكَثَرْ
** اَلشَـــــــدَةْ فِّ اّلله مُجِيـــــبْ اّلطَلْبَة
23 – خَاتَمْـــــــهَا بَكْــــــلاَمْ عَــــــزْ مَا نُذْكُرْ
** تَحْلَــى فِــي ﭬَلْبُــــو فِي لْسَانُو رَطْبَة
24 – وَمْصَلِـــي عَّ اّلرَسـُــــولْ لَمْجَدْ لَمْنَورْ
** أَلْـفْ سْـــلَامْ عْلِيـــهْ وَخْيَارْ اّلصُحْبَة
نسر
ليست هناك تعليقات:
إرسال تعليق