......
نتصبح بميمتي يا محلاه صباح
وبدعاوي للخير معايا كي ظلي
دعاويها درتهم ليا مفتاح
وين ما نقصد كلش يسهلي
بدعوتها يطيعني من هو رداح
ودعوتها صور و مسميها جبلي
والوالد على معيشتي في كفاح
يحارب في الدنيا والزمان لمخلي
مصعب دعاويه كي ضربةلرماح
ل حضرو دعاويه يتخفف حملي
حق الشاعر لوالديه ديما مداح
ونمدحهم بابيات كما لي قبلي
واجب عني ديما ليهم لحلاح
دعوتهم هيا لي تسلك خبلي
هما عزي وربحي في لرباح
بيهم هما يتلمد ذا شملي
هما شمسي في النهار الوضاح
دعوتهم ضوي كي يظلم ليلي
اجعلهم يا خالقي بجور الصلاح
والشهدا المجاهدين لي فيهم اهلي
هما سيادي درتهم ليا مركاح
ومشايخ ليا ذو منبت اصلي
رضايتهم عليها انا في تكواح
ومنعصيعم قول ولا في فعلي
طاعتهم واجبة ونولي في فلاح
والمولي كريم كل دعوة يقبلي
تحضر دعوتهم كي نتمد ع الصفاح
في نهار السؤال نثبت في سؤلي
ذي حقيقة قلتها وبلا تلماح
قبل النظم شديتها في عقلي
ندعيك يا ربي ياخالق يافتاح
ارحم هاذالخلق يامن فيك تكلي
وطيب ذا لقلوب صفيها م تقساح
ووقفها للخير انت المولى لمتولي
نختم بالصلاة على طبيب الأرواح
بالصلاة عليه لي خصت تلحق لي
ليست هناك تعليقات:
إرسال تعليق