فراق وحنين
أنا من لفراڨ ڨلبي راهو طاب
سُمطتـلو ليّام شي ما يحلالـو
مَلفـُرڨـة تكويت ياسر يا لحباب
في جوف الكبدة يڨدي مشعالو
ودموع العينين طاحت ملهـذاب
حفـرو علخـدّين وَاديـن و سالـو
والخاطر مشغول ديما فلًي غاب
زايدني تخبال ماعـرفت حوالـو
ياتشطاني وااه لو طوّل بجواب
نتبـاشر بأخبار ناسو وش ڨالـو
يا محبوبي انت الرّاحة ولعذاب
فيك دوايـا يا هنــايـا بـكْمَـالـو
بعّـدني المكتوب عنك دار سباب
ما اڨساها ليّـام بعدك يـطـوالـو
وإذا طاح اللّـيل بظلامو رهّاب
والنجمات الضّـاوية عني مالـو
وتلاڨاو لكل مع الوحش الغلاّب
عادو مثل السيّل زادم بـهوالـو
رافدلي لشواق بالكُثرة كي جاب
نبضاتي فالڨلـب زادت تقـوالــو
ياليت ألّي صابني في ڨلبو صاب
وإذا جا فالــبال يحـظر بخيـالـو
عمري لا حطّيت فيه الـظّن وخاب
يتفكـّر لعــهـود نخــطر في بالـو
من تخمامي فيه عُدت من الشِّيّاب
يا ليت المكتـوب يَـزيـان بْـفـالـو
وأنا من لهمـوم ڨلبي راهو عـاب
يرجا في لـفـراح والخيـر ينالـو
ياسمين
ليست هناك تعليقات:
إرسال تعليق