قصيدة بعنوان:
"يا ظالمني"
ياظالمني عفيت عليك عند القدرة
واجري ع الله سبحانه لكريم
لا م ضعف عفيت ولا م كسرة
ف كل قوتي وانت ضعيف سقيم
راني عفيت عليك هاذي المرة
بشهادة الله راه للغيب عليم
اذا كنت ظان لقفازة غدرة
احذر م الزمان راه ليك خصيم
اشحال م لءيم احصل في دورة
لا تحسب لحياة خفة وزديم
لا تتمرد ولا اتعاود الكرة
ينفد صبري معاك القيامة تقيم
في كتاب الله تعلم تقرا
من ايات محكمات منظم تنظيم
انا حين عفيت اقريت فالسورة
اجر م اعفو عند الله عظيم
خشية من الله وحب فالسترة
رحمة الله مع م كان رحيم
هذا كلام الله م فيه هزرة
م قالو شاعر ولا من تنجيم
يا ظالمني في ضحكة ونحرة
لا تحسبني غافل وانت فهيم
يا ظالمني علاش ذيك الخزرة
م رفعت شانك لا خوفت بهيم
عفيت م ندمت يعلم رب لورى
من هداني ليه لدربه المستقيم
سنين من عمري اعطاتني خبرة
حين نتكلم وحين نحفظ الميم
مصاحب لمدن وكم من دشرة
وعرفت ما فيهم م سيد وخديم
شافت عيني قوم مواقفه ثورة
وشافت عيني قوم خنوع عديم
اخذينا لمليح من اطيب شجرة
وعلمنا قومها من احسن تعليم
وكلينا من خيرها احسن ثمرة
وعرفنا لابد للنفس من تقويم
الحمد لله ما احسنها فترة
افهمنا معناه طلق ولى قيم
ومع ثاني قوم محلاها هجرة
من اسوا اقوام يمشي بالنميم
من رافد منشار زايد مزبرة
واش يواسي بذوك الات التقسيم
م علمنا شي غير ادي وارا
من اخبث شحرة والرحم عقيم
لو كان عمري كالمبنى ياحسرة
م يصعب الحال في يدي الترميم
نصلح ليام اللي امضات عورة
يوم كانت عيني محجوبة بالغيم
انداوي كيتي لا م يسمع ويرى
نجلب بالحسان ليا كل خصيم
عسى من ظلمت م جرحه يبرى
م كنت سبه ليه ف جرح قديم
نشري غيظه اذا كان يتشرى
ونعقم جرحه بكل انواع تعقيم
يعفو ويسامح ما اسعدها بشرى
ويرتاح البال اللي كان هميم
لو دريت هكذا فالدنيا يصرى
نقبلها مظلوم لا ظلام غشيم
يا ويل الظالم م عنده فكرة
يوم لحساب ما يتكلم بكيم
يوم يتحاسب على مثقال ذرة
يرجع ليه عدو م كان حميم
م ينفع سلطان لا جيش بكثرة
عدالة الله تردع كل ذميم
ذاك اليوم ذليل شاخص النظرة
خلف ليه وعده الشيطان الرجيم
يا فاهمني عشرة على عشرة
كلام بن عمار نابع م الصميم
بوالفلفل خايف من يوم العسرة
ربي كون امعاه يفوز بالنعيم
ثبت بن عمار يوم المقبرة
باب الاخرة جنة ولى جحيم
ايلاقيك بخير في احسن صورة
راضي عنه م كرمك يا حليم
واجعله م سيق في احسن زمرة
م فازوا ذاك اليوم بعد التقييم
واسقيه من كوثر ابي الزهرا
خاتم الانبياء مول الخلق لعظيم
بقلم الجزاير
ليست هناك تعليقات:
إرسال تعليق