و.. ياربي بجاه طه بولنوار
وبجاه الملايكة والاوليا
سلكنا مابين لنياب ولضفار
ترحمني يا خالقي عال العليا
هذامرض وراه شربني لمرار
خلوضني وليت مافاهم حية
لونحكيه على الحجر يبدا يصغار
يتفتت ويعود رملة مربية
شلهبني يا خاوتي هاني مضرار
لا طالب لا طبيب عرفو لدوية
فلوشني وليت فالزنقة دودار
بين الحوش ودار ذا الروحانية
مرمدني دون العباد مع لفجار
كي نفطن نلقى خيالات لبية
مرجني وليت نهوان ونڨصار
نترامى ونشوف فيها قي هي
سكرني وليت للقرعة دفار
والكيسان على طرافي مملية
قرعة نونة غلفوها لي باشعار
كيسان ام النون ڨلبوا عينيا
مرض غرامك نونتي طول لعمار
ليلة عوض العام طية عن طية
يا نونة سماك ذا الشاعر فالجار
بين الكبدة مع ظلوعي والرية
دهللني بين النسا لبدا دوار
كي نخزر في بنت نحسبها ليا
ساعا نلقى نونتي خطفت لنظار
في ساحات الحرب مثل الجندية
والا الشمس منين تاقت شاو نهار
وتلوح شعاعاتها بين يديا؟؟؟
والا قمرة طالعة تڨدي لنوار
مسدولة وتجي حذايا مرمية
والا نخلة نابتة في قاع صحار
من نخلات التاردال الغربية
طاح شعرها ع الكواسرفيه ظفار
يتلاوح وادايو ريح عشية
عينيها جعبات بومشطة دڨار
واهدبها سعفات حلفا ديسية
خديها تفاح يشروه التجار
يغدا للملوك وسط الطبقية
والمشية عميد متكون مختار
من خريج الروس ناسو حربية
قشوة ناصع لونها بادي يحمار
مربوعة فالقد ماهي شحوية
ما هيش طويلة الطول لي يوعار
سامات كتافي وطلعت بشويا
تحضيها يا خالقي نونة فالدار
خمس حروف اللي معاهم قصية
ذي مدة وسنين وانايا حبار
حاضيها كيما ان حاضي عينيا...
الخ
ليست هناك تعليقات:
إرسال تعليق