#رسالة لمن لا يعرفني
ماجيتك ولا ربطت معاك سلاك
شفت محبة في ليالي مبيوعة
ماني تابع ما نوالي من والاك
عشي ما نبنيه في غار ضبوعة
المرزوڨي كي نسر حرمي عافاك
طرڨاني ب وقار عقلي مصنوعة
واذا كنت انا حبيب اللي عاداك
لا تقحمني في صحايف مطبوعة
ولا تعرضني باش نكره من خلاك
ماني عكلي بالمناڨش مرصوعة
لا ترجاني نقاطعو و نطلب رضاك
ولا نميل شوار كفة مخدوعة
نجبر واش قدرت للخاطر نهداك
ولا نحكم سابعي بين سبوعة
لا يعنيني واش قدمت لمولاك
ولا طريق مشيت فيها مقطوعة
تتحاسب على مصيرك وين داك
تفطن كي تلقى البڨرة مرضوعة
اسمي ضاهر جاب رسالة وصاك
جبت خصالي في بياتي مرفوعة
عايش قانع شابع الدنيا حاشاك
شفت وعفت التابعة والمتبوعة
متواضع ب ركان قدري نتحاشاك
وعندي كلمة ف الجماعة مسموعة
حرفي طايع للشيوخا ما نرجاك
تهداني لحروف خرفت مشنوعة
وادي حامل والسواڨي ليك هلاك
راويها بالشيب عندي موسوعة
هذا قولي ليك واللي جاب معاك
فالمرزوڨي سيرتو كي مطبوعة
صنت سلاحي بالقوافي جا فتاك
وقست محارق للنفوس المصدوعة
#
ليست هناك تعليقات:
إرسال تعليق