قصيدة عبارة عن رسالة بيني وبين
الشاعر محمد نعيمي
بعنوان
:::::** حال ..... و ..... احوال ** :::::
#جمال_جلالي
01 – شوف الدنيا حالها كيف تبدل
ما بقات محبة و لا صحبة كي كان
02 – الجار لـي كان على جارو سول
لا من سال عليه تسدت البيبان
03 – وين صيلت لرحام حدث لا تخجل
وين الخاوة وين عادات الجيران
04 – وين النية وين كلش راه رحل
هذا من هـذاك يا قاري لمان
05 – ويـن لمة لحبـاب يا زاير انزل
مرحب يامن جيت قاصدنا نيشان
06 – وين الحرمة و الحيا رايح ويقل
راهي غير تزيد النية تشيان
07 – وين بنت لعراس بالفرحة تكمل
وين اللُحمة وين بنت رمضان
08 – امجالس بشيوخ قران ترتل
و ابيات الملحون بالحكمة تزيان
09 – وينهم القعدات قعدة ما تتمل
متمني يا صاحبي لو راني غلطان
10 – وين التاجر كان يوفي و يكيل
راه اليوم حلاف يطفف فالميزان
11 – مانيش نعمم ما قلناشـي كل
حاشى من صدقو خافو م الرحمان
12 – رحمة ربي كاينـة علينـا تنزل
لا تجعلها غتبة و يا عظيم الشان
13 – لو نعد الوين دهر وما تكمل
حيرني ذ الوين من بالي تعبان
14 – ما شافت عيني ذ الراجل ينذل
كيما وقت اليوم بلا سبة يتهان
15 – الجاهل قدموه في الصف الاول
و العالم تلوه من تالي ما بان
16 – الجايح داروه مضــرب للمثل
و الساجي ردموه لمثالو عنوان
17 – ما عادش كي كان ما عُدش نحمل
خبرني يا صاحبـي وين ايام زمان
18 – ترجيتك بالله صحيني عقل
عقلي من عقلك للعاقل ميزان
19 – واذا قلت هبيـل خليني نهبل
تهدفلي سعات ياسـر من لمحان
20 – راه القلب مريض لجوابي عجل
جاوبني يا صاحبي خيك تعبان
21 – راني نرجى فيك وعلاه طول
انطق يا حرفو اروي ذ العطشان
22 – يتفاجى ذ الخاطر وعليك معول
صبرني يا صاحبي نسيني لحزان
نسر الصحراء جمال جلالي 02/01/2022
محمد نعيمي
01 – نقطع مـن فمك شهــد عسل
و سمحلي يا شيخ يلا تلفت لوزان
02 – ماني بحديث نهجـي لا نغزل
غير كلام جاني طرف لسان
03 – شـاو الدنيـا من قبيـل تتبدل
و من شـاوها مـا فيها لمان
04 – لا تلوم الساعة دقايقهـا تكمل
تاليها حفـرة و مقطع كتان
05 – سباب غلبتنـا غلبنـا ذا الجهل
من جهلنـا تركنـا كتاب الفرقان
06 – مخيطنــا بـالخيــط راه تخبل
و راس الكبة خفى علينا ما بان
07 – الحيلا و الشر منسجهم مغزل
و الاهف لبدا لطمعة عطشان
08 – ذا عايش سيف لاخر بالمنجل
وذاك يرجى فالحـــال يبان
09 – شـي من حـرم شي مـن حلل
وشــي يفتـي بـــالوجه لوان
10 – ضنـو الجنة فالصــــف اللول
نسـاو الآية فـي سورة لقمان
11 – مـــن عـز الدنيـــــا لابد يتهول
يعيش في غلبة مغلوب الشيطان
12 – لا مـــلا لا ديـن لا ليهـــم اصل
مزينو برهوش كحال الحر شيان
13 – الباطــل عــلا و الحـق راه نزل
حاشا في قولي يلا قلت فلان
14 – مـــــا نشبه ذبـان لخليت نحل
ومـن عز النفس عمرو لا يتهان
15 – لا تلـوم الدنيا يـا عاقل و عقل
و قرا فالمنزول تلقالك برهان
16 – و اللـي ســــال عمـــرو لا يهمل
و حديث النادم ... اه يا لوكان
17 – فاض القلب للوطــــا راه حمل
شتا يسكت عين دمعتها ويدان
18 – خايــف قولـي كـي عيطـا يتمل
و يقلـو ذ مــا هـو لا بهتان
19 – خيـر كـــــــلام مــــا قــل ودل
و انــا كلامـي بالمعنـى كان
20 – فــــــ22 نضمــــــــــي راه كمل
بعــد الالفيـن فــي لول شعبان
21 – نختــم بالصـلاة مـن لا ليه مثل
تـاج المرسلين وخليل الرحمان
محمد نعيمي 04/03/2022
ليست هناك تعليقات:
إرسال تعليق