مجاراةجديدة مع الشاعر الشيخ بوراس...............
الشيخ بوراس :
بسم الله بديت قولي يا حضار
وسهل ليا ياالله في ذا الموجة
نكرد عودي نسرجه في شاو نهار
والروبيست على الكتف تقعد عوجة
عودي لرزق راه واجد للمشوار
ومقيد هاذ المحج فيه الفوجة
سفيان دحماني :
راني واجد يا رفيقي في لفجار
ونخلوا هاذ البرور المسيوجة
وزويجة فوق الكتف ماهي مسمار
نرفدها ونحس روحي كي الخوجة
و قصدناه البر بخيول التشهار
ونبقي ناسي اولادي والزوجة
الشيخ بوراس:
يا دحماني نعرفك فارس مغواار
وناسك معروفين مايهدو حوجة
ونايا نشتي الراجل للتخطار
هذا بر طويل وارضه مرهوجة
يعناها قير لمعنقر و القهقار
يصفاها وديان ولا مرجوجة
سفيان دحماني :
عرفتك آ بوراس بالسيف البتار
والصيدة من قساك تغدا مبعوجة
وتهلك هيا نزورو ذي لجدار
ونتوقوا نلقوا الخيمة المنسوجة
مبنية و مبيحة بارض القيفار
بركايزها الطوال بانت مبهوجة
الشيخ بوراس :
الخيل مربطة على حد الدوار
والحلابة تبان تبرق مزجوجة
والراعي تلقاه بالقصبة نشار
فنون الصحرة هداها ممزوجة
والطالب فالمحضرة يقرا لذكار
صوفية يهدوا الجلسة مهجوجة
سفيان دحماني:
وخيار العلفات لزرق دار بدار
يوم الحزة تشوف فيها مسروجة
وتويزة ومناقلة واقش شطار
و يصفوا ذيك الغلول المنتوجة
وصيادة يكلفتوا لرنب و حبار
وتشوف دمويات منها منجوجة
ليست هناك تعليقات:
إرسال تعليق