يامن تسأل حالتي ليا ڨرب
راني ذا العشوة مغيم كالرعبوب
هاذ الوقت الي طلع فيه المذنب
تتخلط فيه القفازة بالمكتوب
ما يهدو تراس، في حالو يرتب
يرموه بلسهام ويقولو له توب
خاطيهم وكلاو لحمي ذا المكلب
مضغوني وانا على مخي مكبوب
و.. بلعاني نشابهم فيا ينشب؟!
لاهين بحالي نقول الله ينوب
مايهدوش العبد منهم متنكب
ينطق يا لوكان من فمه مسبوب
وسبع الهدة من الجليبة متعقب
والصرعوفة لاعب عليها ثعلوب
لا بولاع ولا صمايم تتجرب
لا حلفاية نابتة درقت بالروب
لا حيحاية مع الحلايس تدرب
ياحصراه على الصيد لي مرغوب
لا ساس بنيناه ع الصح مقطب
علينا فوق الرمل بنيان الطوب
لا موالة مع الصحاري تتنسب
لا خيمة لا ملكمة والحال جدوب
لا بياتة مع الفيافي تتسرب
لا دخان يبان طالع من عرقوب
لا ضيفة لا ضياف بيهم تتمرحب
لا طولالة لا تويزة لا محبوب
شوفو ثاني كلشي راه اتخرب
هاذ الوقت اللي زدك ولى مغلوب
ما عشنا مثل اللوالى عيش عرب
لا عشنا عيشة البساطة والمكتوب
حبينا نمشوا مع جرو الثعلب
والفخ ردمناه لمحجنا منصوب،
مكمومين افوامنا باه نقصب
والبراد اللي يسهرنا مثقوب
لا فاتيرة لا صنية لا منصب
تصماك الجلسة وتبعنا مجدوب
هانا وينا دايرين على مضرب
جيفة وحدة حاكمتنا فالعيسوب
ازهى يا مركي بوقتك المذهب
علي ذيك المكحلة كلش مخروب
من حقك لا قلت ليهم نتقبب
تتلفت ويبان لي طرفك مهلوب
نطلب ربي خالقي زين المطلب
لا يهدا فينا مغفل لا مغلوووب
نواني هاذ العشية مزن يصب
فيه خنافس ياسرة حت العقروب
جيت نخلي فيه نلقاه مقرب
جيت نسامي زادني قرحة وندوب
وانا لاهي في منامي متعجب
لعل ربي يحتت طرف ذنوووب
خلوني نرتاح منكم يا مذيب
لاهين بحالي وفيهم طرف عيوب.
ليست هناك تعليقات:
إرسال تعليق