.. قصيدة الشامة.....
كل نهار نشوف شامة تسلبني
يتلفلي هوصي نولي في لقراح
نتقوزل ونعود منها كالمثني
نرفد عينيا ونقلب للتصحاح
نلقاها في كل موضع تلطمني
كحلة حتى لونها زايد تقساح
طبعتها وكوات ذا لخد اليمني
تتلالى وتنفطو منها لجراح
من نونة هاني انُْوني وانْوني
ونساعف فالعين هدعوها لرماح
كية قلبي ع الصبر راه هجرني
فرفر عقلي صرت فالزنقة نواح
الناس تبات هانية وانا محني
كي تغفى عيني يهزوها للماح
واللي بيا ساكنة ليا جفني؟!!
مرموحة وهدات في كبدي المراح
نتغزل ونقول ذا المرض المسني
رشالي عظمي وكسرلي لجناح
ليست هناك تعليقات:
إرسال تعليق