يا ماشي شق البحر نوض نوصيك
عندك لا تنسى وصاية ذا الشاعر
عاشو في ذاالبر ناسك ومواليك
هاذي مدة ما خلق منهم حاير
دارو غزوات من عهد الباليك
كانت مزغنة مع الخير الوافر
زادو ثورات ثاني ما يخفيك
ذاك استشهد ذاك منهيها ثاير
قساوة فالجو والفقر مساميك
والمستعمر دار فينا ما داير؟؟
برد البولع في الشتا لا ما يدفيك
وصمايم زاد حرها وقت عناصر
بين مخالب وانياب وما يكفيك
ما يشكوا ما شمروا حد الكاسر،
صبروا في ذا البر قي باه يزهيك
نبتة زرعوها وكنت لها زابر
ضركا عاد بلادنا زين مكافيك
قوة في الشمال تضرب وتناور
وسبوعة فالجيش تدرب تحميك
بر وبحر، وجوها فيه الطاير
والبترول الخام من لرض يغذيك
والغاز يبان فالجعب يقدي زاهر
مصانع متنوعة ذي فخرة ليك
شعب موحد ناض باسم الجزاير
خاوة خاوة ما قسمنا بوليتيك
لا جهوية؟؟؟ ولا مرض يضاور
لاعروشية تْفتّن ما تغويييك
لغة وحدة ودين واحد يتباشر،
يامشي شق البحر واش يلاقيك
ذل ومذلة مع دين الكافر،
وتقاليد من العدو غادي تسبيك
شعب بني عريان ماليهم ساتر
مكتوبك لا كنت غاني ما يخطيك
ما تعجل ما تعود للكفرة هاجر
تنسى ثما حباب حتى والديك
تهداهم يبكوا على حر السامر
لا خاوة لا صحاب لا حد يساميك
لا عباد تعود بيهم تتجاور.
لا زوجة حجابها زين مبهيك
لا ذرية صالحة وانت ساهر
تجري والاورو تحطه بين يديك
تحسبها وتزيد تملي القراير
ماتنفعش المادة كي طاحت بيك
جلدك خلل فالعظم وانت قاصر
وتوصي لاحد ثما يسمع فيك
دفنوني في بر ناسي نتقابر
والبيي راني مخلص بوفاريك
عجلوا بيا لا نولي، نتعاير..
ناس البيض وجدو العزاقاشيك
وبناو الڨيطون والشعب يداور
قالو هذا عمنا واسموا جاليك
والجنازة تاعتو بعد العاصر..
بري رغم قساوتك راني نبغيك
ما نحرق ما نعود بالعمر مغامر
ما ياكلني حوت وانا مانخطيك
ما ندخل للحبس نحضا منتاحر
.... الخ
ليست هناك تعليقات:
إرسال تعليق