بشعر العامية المصرية .
بقلم د / عبد الرحمن فتحي الحناوي .
( كرهت كلمة رحيل )
بلسان امرأة .
كرهت كلمة رحيل .. كرهت كلمة سفر
وتعبت لما الأصيل .. ودع بلادنا وهجر
يا حبيبي زاد البعد من همى وجرح ذاتي
غير معاني الحب وآلمني عكر حياتي
الوحده أصلا صعبه .. هوا انتا فاكر إيه
والغربه سايبه القلب .. في حاله شكلها إيه
مراسيل كتير وكتير
وسفير بيجيب سفير
والرد منه خطير
والوعد كله سراب
خايفه عليك لتطير
مني وانا بغير
لو حتى لابسه حرير
من لمة الأغراب
قلبك قسا كدا ليه والقسوه منك حجر
ولا شفنا منك غير الحيره وطول السهر
تعالى تعالي تعالي
كفايه علينا طلتك
تعالى تعالى تعالي
كفايه علينا عشرتك
تعالى تعالى تعالى
كفايه علينا بهجتك
كفايه علينا الأماني
كفايه علينا همستك
كفايه نفهم معاني
مرسومه رسم ف كلمتك
عبير الزهر ف وردتك
وريحة الفل ف سكتك
كفايه تجينا من تاني
تنور بيتنا بضحكتك
كفايه علينا التهاني
لما تنوي عودتك
كفايه تجيلنا ف ثواني
كفايه علينا بسمتك
كفايه لو مره نعاني
نحلم بروحنا ف جنتك
آه .. آه .. وألف آه ... آه آه يا قلم
آه .. آه .. وألف آه ... آه من حرقة الألم
آه .. آه .. لما الحنين يتوه في سكة الندم
آه .. آه .. لما الأصيل يبات يدور عالعشم
آه .. آه .. لما تروح من بين إيدينا يا بطل
آه .. آه .. لما تقول راجع إلينا ولا حصل
اه .. آه .. لما تعود واسمع كلمة دا وصل
------------------------------------
مصر .
الخميس ١٤ من يوليو ( تموز ) سنة ٢٠٢٢ .
ليست هناك تعليقات:
إرسال تعليق