من طبعي ....بقلم جمال جلالي

 #من_الارشيف بتوزيع جديد 

✓✓✓✓✓ من طبعي ✓✓✓✓✓

_ مــن طبعي نَبْعَــدْ نخســر ونفــارق 

   مــانيش حقـودي ذ القلــب مصفيه

 

_ ما ننكرش الخيــر في قولي صادق

   نسامــح ونڨـــول الوقــــت يكاكيه 

_ ما نعرفـــش نــدور نكــــذب ونافق

   مــولا زوج وجـــوه نبيعو لا نشريه

_ مــا نعرفش نعوم في البحر الغامق 

   الـواد الموحل ياك ما نطعنشي فيه 

_ مــا نطعنش ظهــر مـــن فيـــا ثايق 

   ما نهدر ف الغيب لساني حاكم فيه 

_ مـــانيشــــي زواخ نافـــــخ متسلق

   و لا راني مغــرورو لا تعايرنــي بيه 

_ ما نطمع فالطايرة في سماه محلق 

  الطامــع فيهـــا يـــاك لا بــــد تعييه 

 

_ نفرز بيــن الكــوز و زريعــت لحبق

   نتمتـــم للفاهـــم يفهــــم معـــانيه

_ راضي بالمكتوب الشدة ف الخالق 

  خالق ما ف الكون خلقو و مسويه

_ ما خطت اقـــلام في كتابو سابق 

  بين الكاف و نون أمرو راجع ليه