السجرة مالت
قولي قداه ياشجرة من يد سقاتك
والله ما تفلح بذرة كي تخزي لقدار
ضنتك مغروسة سبولة في قلبي
وأنت مغروسة في ذخان النار
نظرة من عينيا ما شافت غيرك
ساموك حواء ما فيهاش غبار
نظرة من عينيا ما شافت كيفيك
عشتي مذلول في وسط الفخار
يشهدلي ربي ما غواني زينك
ويعرفني بري كي طير الحبار
ما دريت غرامك ينكر بخصالك
أصلي من بكري ما نحملش العار
يا وردة شمامة من جاه يشمك
ياحسرة كي كنتي وردة في لقمار
شفتك في عينيا مرايا تتبدل
وغرامك محال ما تجرو لبحار
ماني قصة حب ما نشبه حيزيا
وماني حود سعيد ما غمض لشفار
أنت ضو بصاري وما شافت عينيا
زينك فالعوقية يواتيها لخمار
عكستني ليام في ضو بصارك
نسهر طول الليل في بالي محتار
سقسي هم الريح فراقي زاد ضرارك
مضنوني فالعين فضحتو لخبار
بدلتي لقلوب قولي واش صرالك
واش من قلب يعز ياخاين لكبار
ياحليلي كي عدت مانحلى في عينك
خانة بالقيمة وجوفي سرج حمار
خانة مطبوعة فالوجه بهاتك
والخانة لولة ما تشبه لحجار
يك لغرام يكن في عز نفاسك
والقدة مكتوب ما فيهاش خيار
شميتك فالقلب وردة نسقيها
والزين الغالي ما تحفرو لظفار
نوحي ياعيني على فراق جمالك
في قلبي نغزة وفي بالي غيار
في قلبي نغزة وفي بالي غيار
بقلمي شاعر الكلمة الصادقة النقيب
ليست هناك تعليقات:
إرسال تعليق