للبيض تدي جوابي ذا الخطرة
تيم لي نا خوك واوصلي لحباب
قول لهم واقيل من هاذ، المَرة
مانرجعش توالكم راني مصاب
راني بين الشوك وعروق السدرة
متخلخل ڨلبي مهتك بالنشاب
ولي كانت طيبة رجعت مُرة
ياويحي ماعاد ليا ما يطياب
ونخطيها بالاك من ضري نبرا
هاني حاس بنار تڨدي في لجناب
من طبعي مانيش صابر للجمرة
وجهنامة شوف مڨساها بعذاب
هاهي كل فريستي منها حمرة
وتصماط الڨعدة بلا كحلة لهداب
........... قولو لها منك نسرى
وندهكل بين المروت مع لعلاب
وواد الدفة نخيروا فيه العشرة
ونزورو ذيك المقامات ولڨباب
حشمناهم في اليالي والسهرة
نوضناهم كملوا فالنوم حساب
ساميناهم؟! لازم عليهم نقرا
وندعي مولانا يفوجلي لبواب
وللبيض تدي جوابي ع البكرة
ويامرسولي هاتلي منهم جواب
راني ذو ليام عاشر فالصحرة
متلبط ذيك الڨعادي كي العقاب
واد المڨرش والنثايل و الحجرة
جبل التوميات ڨبل في لسهاب
فيض العايب فيه فتش ع الجرة
ارض خفية يشڨها غير الڨهراب
مرحولي مازال خارج من زرة
خلفناها في القناطر يا لصحاب
متولع بالصيد لغزال الحرة
كبرت وتعلات معفية واقواب
واروانب نونة ونوبة تتمرى
تخزرها حافرة مع الرملة زرداب
واقطى واحجل عاجبتني فالفرة
حس الصاشم كوع لي قافز راب
وسلاق يحدو الصيد بلا غدرة
مايهدوشي غيرهم مالي لخباب
وشياهي فالين فالارض الحرة
حلابة وجلادها عز التكساب
منهيها عاطفة الناقة والبقرة
كل اخرى بوليدها تملي حلاب
والبدوية نايضة طفلة شڨرة
مثل الشمس الطالعة بعد التشقاب
حشامة ومهدونة مثل الشجرة
ما يصفاشي ظلها غير النساب
لونوصفها كل شعري يتذرى
خليها حتى نجي ليها حبحاب
يامحلاها بلادنا فبها نظرة
قبلة للسياح واللي جا طبطاب
فيها يهنى خاطري بعد المكرة
يتلخلخ فيها اللي عاشق يتصاب
يصحى فيها الي موالف بالسكرة
ويتهدن فيها اللي قالق يطراب
والمهبول بحالتي عندو ذرة
وارثها من بوه للراوي رحاب.
عشقي والملحون زادو في الڨرة
والصحرة وحوالها ليا تطباب
م البيض هاتو جوابي في فقرة
يقراها قدام عينيها جراب
هاك الوردة دايما تبقى زهرة
قي يصياف الحال تذبال وتنذاب
وهاك النخلة دايما فبها تمرة
مهمى كان الحال تطوال وتنصاب
هاك الڨمرة دايما تبقى ڨمرة
بعد فجور الحال تدّرّق تشهاب
هاك النحلة دايما تلدغ بابرة
تلسع بيها والعسل منها ينجاب
هاك النجمة دايما تبقى درة
شفناها مرة على مرة شهاب 🌠
ارجع يابوراس لبلادك سترة
فيها عاشو جدود لميمة والاب
مازالت فيها النخوة والشهرة
مازالو فيها حبابك لاه تخاب؟
مازالو فيها ڨراڨر للعبرة
وتخير، من كل خيمة للتنساب
ارجع يابوراس هذي قي فترة
موقوتة هيا طويها طي كتاب
البيض ورجالها لينا نعرة
فتش فالتاريخ يعطوك الجواب
مافينا دوني ومافينا نكرة
مافينا حتى مزخلش لاغتاب
شوڨعتيني يا حبيبة يا صحرة
نسيتيني في بني عمي واتراب
في بالي نهداك في ليلة عشرة
نتونس بضيا الڨمرة للتغراب
والصلاة على النبي اب الزهرة
محمد شفيعنا يوم الحساب..
