--------------------
( من يوقف إطلاق النار ؟)
جندي بطل واقف بيحارب العدوان
ماسك في إيده سلاح والتانيه فيها نيشان
غزاوي عاش من صغره يحارب الطغيان
حالف ياخد بتاره من شلة العدوان
*****. *****. *****. *****
أنا شفت بعيني مناظر يشيب لها الولدان
شفت الإيدين مقطوعه لعدد من الغلمان
شفت العيون مخلوعه لشباب بقوا عميان
شفت الرؤوس مفصوله بيجهزوا الأكفان
شفت الكوارث نايمه عالأرض والغَثَيان
شفت الأطبا تعالج وجروح في كل مكان
المرضي فوق طاقتهم عيان ورا عيان
والحرب دي خلتهم نشاط في كل مكان
شفت الصغار واخدين بعضهم بالأحضان
وبيهربوا م البرد واخدين على الدٌفَيَان
ولما الوقود شح مات منهم ألبردان
*****. *****. *****. *****
شفت الكرامة اتهانت شفت الخضوع ألوان
شفت السياسه دي بانت مخالبها للشجعان
شفت العداله تاهت في مؤتمر ولجان
شفت التاريخ بيقرر يواجه الطغبان
شفت الطعام بيمرر في حلق كل جبان
شفت المآسي واقفه عالباب وعالجدران
شفت النداله كاسيه وجوه كل اللي خان
شفت الحقاره راسمه بإيديها وش شيطان
*****. *****. *****. *****
امتى الأمور تتصلح وغزه تبقى أمان
إمتى الغموض يتوضح والشهم يومها يبان
بكره الزمن راح يكشف ويتفضح الجبان
دي حرب ولا مؤامره الكل فيها خسران ؟
دا ضرب ولا إباده الشعب فيها اتهان ؟
دا كل يوم في زياده والدم عالحيطان
والدنيا واقفه تبص ببلاهه وبكتمان
بتأيد المحتل و تبارك العدوان
كده الميزان اختل والقمه في القيعان
والحق هو الظالم والباطل الكسبان
دا عالم عكْس مبادؤه وكل شىء حيْبان
والكل ياخد حقه بعداله واطمئنان
الباطل ما حدش رده ما لوش ما بينا مكان
غير الحفر وحياته تبقى مع الغربان
*****. *****. *****. *****
بين الشرف والعزه يا غزه ليكي مكان
و اللي سكت واتخبى ضاقت ما لوهش مكان
دا الانتصار له لذه ما بيعرفهاش جبان
وغزه رمز العزه رغم الخطر اللي كان
بيهدد كل حته ضيع حقوق إنسان
فين القانون الدولي يا حضرة الزنان
صدعت راسنا وليه واقف كدا خجلان
المجرم خلى راسك تنحني للطغيان
وقتل فيك إحساسك وشعورك بالامان
كلام كلام ومفيش فعل يرد الجبان
حرب هدفها تطفيش سكانها من زمان
حرب هدفها ما يعيش بني آدم في المكان
*****. *****. *****. *****
يا اتنين وعشرين دوله عربيه يا سكان
يا رؤسا يا حكام يا أمرا يا عربان
سايبين ليه غزه تنزف ما لكمش ألف لسان
ما عندكمش جيوش تهدد الامريكان
مالكمش سطوه ليه وهيبه تطفي نيران
بتحرق قلب الامه وتهد في البنيان
لو كلكم إيد واحده تغلبوا ألف شيطان
*****. *****. *****. *****
بلد عربي منكم فلسطين ما تتهان
لها حق كبير عليكم وحيده ف الميدان
يا رب حنن عليها قلوب لابسه تيجان
تنهي الأزمه اللي فيها وتعدل الميزان
وتطرد عدو متهور بعيد عن الميدان
حرب الكرامه حتخلص والنصر للشجعان
*************************
بقلم د / عبد الرحمن فتحي الحناوي.
من مصر.
الإثنين ٢٠ من نوفمبر ( تشربن الثاني ) سنة ٢٠٢٣.
